கரூர் சம்பவ உயிரிழப்புகள்: அரசு வேலை வழங்கிய முடிவை விமர்சித்த சுப்பராயன்

கரூரில் நடைபெற்ற அரசியல் நிகழ்ச்சியின் போது ஏற்பட்ட கூட்ட நெரிசலில் உயிரிழந்தவர்களின் குடும்பத்தினருக்கு அரசு வேலை வழங்கும் தமிழக அரசின் முடிவை இந்திய கம்யூனிஸ்ட் கட்சி (CPI) நாடாளுமன்ற உறுப்பினர் சுப்பராயன் விமர்சித்துள்ளார்.

இதுகுறித்து அவர் வெளியிட்டுள்ள அறிக்கையில், அரசியல் கட்சி ஏற்பாடு செய்த நிகழ்ச்சியில் ஏற்பட்ட உயிரிழப்புகளுக்கான பொறுப்பை சம்பந்தப்பட்ட அரசியல் கட்சியே ஏற்க வேண்டும் என்று தெரிவித்துள்ளார்.

“இழப்பை ஈடுகட்ட வேண்டிய கடமையும் பொறுப்பும் சம்பந்தப்பட்ட கட்சிகளையே சார்ந்ததாகும். அதை அவர்கள் தான் நிறைவேற்ற வேண்டும். அதற்கான முழுத் தகுதியும் அந்தக் கட்சிக்கு உள்ளது. அந்தப் பொறுப்பை நிறைவேற்றாமல், அரசின் மீது அந்தச் சுமையை ஏற்றுவது ஜனநாயக அரசியல் அமைப்புக்கு ஏற்றதல்ல” என்று சுப்பராயன் கூறியுள்ளார்.

மேலும், அரசியல் கட்சிகள் ஏற்பாடு செய்த நிகழ்ச்சிகளில் நிகழும் விபத்துகளுக்காக அரசு வேலை வழங்கும் நடைமுறை உருவாக்கப்படுவது எதிர்காலத்தில் பல்வேறு சிக்கல்களை ஏற்படுத்தும் என்றும் அவர் எச்சரித்துள்ளார்.

“அரசியல் கட்சிகளால் ஏற்பாடு செய்யப்பட்ட நிகழ்ச்சியில் ஏற்பட்ட கூட்ட நெரிசல் மரணங்களுக்கு அரசு வேலை வழங்கும் முடிவு கடுமையான பின்விளைவுகளை ஏற்படுத்தும். இந்த நடவடிக்கை அதிகாரத் துஷ்பிரயோகமாகவே வரலாற்றில் பதிவாகும். இதுபோன்ற முடிவுகள் எதிர்காலத்தில் அரசுக்கு கடுமையான நிர்வாக மற்றும் சட்ட ரீதியான நெருக்கடிகளை உருவாக்கும்” என்றும் அவர் தெரிவித்துள்ளார்.

கரூர் சம்பவத்தில் உயிரிழந்தவர்களின் குடும்பங்களுக்கு தமிழக அரசு அரசு வேலை வழங்குவதாக அறிவித்த நிலையில், அதற்கு எதிராக சுப்பராயன் இந்த கருத்தை வெளியிட்டுள்ளார்.

இந்த விவகாரம் அரசியல் வட்டாரங்களில் புதிய விவாதத்தை ஏற்படுத்தியுள்ள நிலையில், அரசு அறிவித்துள்ள நிவாரண நடவடிக்கைகள் மற்றும் அதற்கெதிரான விமர்சனங்கள் தொடர்ந்து பேசுபொருளாகி வருகின்றன.