தூத்துக்குடியில் மீண்டும் காவல் மரணமா? விசாரணைக்கு அழைத்துச் செல்லப்பட்ட இளைஞர் உயிரிழப்பு; குடும்பத்தினர் போராட்டம்

தூத்துக்குடி மாவட்டத்தில் விசாரணைக்காக போலீசாரால் அழைத்துச் செல்லப்பட்டதாகக் கூறப்படும் 26 வயதான அருணாச்சலம் என்ற இளைஞர், மருத்துவமனையில் சிகிச்சை பலனின்றி உயிரிழந்த சம்பவம் பரபரப்பை ஏற்படுத்தியுள்ளது. இந்த உயிரிழப்பு காவல்துறை தாக்குதலால் ஏற்பட்டதாக குடும்பத்தினர் குற்றம்சாட்டியுள்ள நிலையில், உடலைப் பெற மறுத்து போராட்டத்தில் ஈடுபட்டுள்ளனர்.

தகவலின்படி, அருணாச்சலம் என்பவரை போலீசார் விசாரணைக்காக அழைத்துச் சென்றதாக கூறப்படுகிறது. பின்னர் உடல்நலக்குறைவு ஏற்பட்டதைத் தொடர்ந்து மருத்துவமனையில் அனுமதிக்கப்பட்ட நிலையில், சிகிச்சை பலனின்றி அவர் உயிரிழந்தார்.

இந்நிலையில், போலீசார் தாக்கியதில் அருணாச்சலத்தின் தலையில் பலத்த காயம் ஏற்பட்டதாகவும், அதுவே அவரது உயிரிழப்புக்குக் காரணம் என்றும் குடும்பத்தினர் குற்றம்சாட்டியுள்ளனர்.

மேலும், சம்பவம் குறித்து உரிய விசாரணை நடத்தி, பொறுப்புக்காரர்கள் மீது கடுமையான நடவடிக்கை எடுக்க வேண்டும் என்று வலியுறுத்திய குடும்பத்தினர், தூத்துக்குடி அரசு மருத்துவக் கல்லூரி மருத்துவமனையில் உடலைப் பெற மறுத்து போராட்டத்தில் ஈடுபட்டனர்.

இந்த சம்பவம் தொடர்பாக காவல்துறை தரப்பில் அதிகாரப்பூர்வ விளக்கம் இன்னும் வெளியாகவில்லை. உயிரிழப்புக்கான காரணம் குறித்து விசாரணை நடைபெற்று வருவதாக தகவல்கள் தெரிவிக்கின்றன.