‘பாய் பிரண்ட் இல்லையா? கவலையை விடுங்கள்…’ உங்கள் ஷாப்பிங் சுமையைத் தூக்க புதிய ஸ்டார்ட்-அப் ரெடி!

டெல்லி மாநகரச் சந்தைகளில் நீங்கள் எப்போதாவது பொருட்கள் வாங்கச் சென்றிருந்தால், அங்குள்ள நிலவரம் உங்களுக்கு நன்றாகவே தெரிந்திருக்கும். லஜ்பத் நகர், சரோஜினி நகர் அல்லது சாந்தினி சவுக் என டெல்லியின் எந்தவொரு சந்தையாக இருந்தாலும் அங்கு மக்கள் கூட்டம் கட்டுக்கடங்காமல் இருக்கும்.

ஒரு கையில் மூன்றுக்கும் மேற்பட்ட பைகள், மற்றொரு கையில் தின்பண்டங்கள் என அங்கு பொருட்கள் வாங்குவது பெரும் சோர்வை ஏற்படுத்தும். இந்த நடைமுறைச் சிக்கலை மாற்றியமைக்க டெல்லியைச் சேர்ந்த புதிய ஸ்டார்ட்-அப் நிறுவனம் ஒன்று தற்போது களமிறங்கியுள்ளது.

அறிமுகமானது “கேரிமென்” (CarryMen) ஸ்டார்ட்-அப்!

சோர்வடையும் கணவர்கள், எரிச்சலடையும் காதலர்கள் மற்றும் திணறிப்போகும் நுகர்வோரின் சுமையைக் குறைக்கும் வரப்பிரசாதமாக இந்த புதிய நிறுவனம் உருவெடுத்துள்ளது. இதனால் பெண்கள் இனி பொருட்கள் வாங்கச் செல்லும்போது ‘பாய் பிரண்ட் இல்லையே’ என்று கவலைப்படத் தேவையில்லை.

“CarryMen” என்ற பெயரிலான இந்த வாடிக்கையாளர் உதவிச் சேவை மையம், “நீங்கள் பொருட்கள் வாங்குங்கள்; சுமையை நாங்கள் சுமக்கிறோம்” என்ற எளிய தாரக மந்திரத்துடன் செயல்படுகிறது. அன்றாட வாழ்வில் எதிர்கொள்ளும் எளிய பிரச்சினையில் இருந்துதான் இந்த புதிய வணிக யோசனை பிறந்துள்ளது.

உடல் ரீதியான சோர்வுக்கு குட்-பை!

இந்த நிறுவனத்தின் நிறுவனர்கள் சிறு வயது முதற்கொண்டே தங்களது குடும்பத்தினருடன் இத்தகைய நெரிசல்மிக்க சந்தைகளுக்குச் சென்ற அனுபவம் கொண்டவர்கள். நீண்ட தூர நடைப்பயணம் மற்றும் பைகளின் எடை ஆகியவற்றால் ஷாப்பிங் செய்யும் மகிழ்ச்சி எவ்வாறு மறைந்துபோகிறது என்பதை அவர்கள் உணர்ந்திருந்தனர்.

இதுகுறித்து அந்த ஸ்டார்ட்-அப் நிறுவனத்தின் செய்தித் தொடர்பாளர் கூறுகையில்:

“மக்களுக்குப் பொருட்கள் வாங்குவது மிகவும் பிடிக்கும். ஆனால் அதனால் ஏற்படும் உடல் ரீதியான சோர்வை அவர்கள் வெறுக்கிறார்கள். மக்கள் நெரிசலான சந்தையின் நடுவில் நின்று கொண்டு, பத்து பைகளைச் சுமப்பதைப் பற்றிக் கவலைப்படக் கூடாது. அதற்குப் பதிலாக தங்களுக்குப் பிடித்தமான உணவுகளைச் சுவைத்து மகிழ்வதையே நாங்கள் விரும்புகிறோம்.”

கட்டண விவரம் மற்றும் சேவைகள் என்ன?

இந்த விசித்திரமான சேவையைப் பெற மிகவும் குறைவான கட்டணமே நிர்ணயம் செய்யப்பட்டுள்ளது.

• கட்டணம்: ஒரு மணி நேரத்திற்கு வெறும் ரூ.149 மட்டுமே வசூலிக்கப்படுகிறது.
• சேவைகள்: இந்த கட்டணத்தில் உதவியாளர் ஒருவர் வாடிக்கையாளர்களுடன் சந்தை முழுவதும் வருவார்.
• இவர்கள் பொருட்களைச் சுமப்பது மட்டுமின்றி, கடைகளுக்கு வழிநடத்துவது மற்றும் உணவக வரிசைகளில் காத்திருப்பது போன்ற வேலைகளையும் செய்வர்.
• மேலும் வாகன நிறுத்தமிடம் அல்லது மெட்ரோ ரயில் நுழைவாயில் வரை பொருட்களைக் கொண்டு வந்து சேர்ப்பர். இதன் மூலம் வாடிக்கையாளர்கள் நிம்மதியாக ஷாப்பிங் செய்ய முடியும்.