விசிக-வின் முதல் அமைச்சர் வன்னியரசு! ஸ்டாலினுக்கு நன்றி கூறி சிந்தனைச் செல்வன் வெளியிட்ட எமோஷனல் லிஸ்ட்!

விடுதலைச் சிறுத்தைகள் கட்சியின் (விசிக) முக்கியத் தளபதியான தோழர் வன்னியரசு, தவெக அமைச்சரவையில் ஆதிதிராவிடர் மற்றும் பழங்குடியினர் நலத்துறை அமைச்சராகப் பொறுப்பேற்கிறார். விசிக-வின் சார்பில் தமிழ்நாட்டின் அமைச்சராகும் முதல் நபர் வன்னியரசு ஆவார். இவருக்கு விசிக எம்.எல்.ஏ சிந்தனைச் செல்வன் தனது மனப்பூர்வமான வாழ்த்துகளைத் தெரிவித்துள்ளார்.

ஸ்டாலினுக்கு நன்றி கூறி உருகிய சிந்தனைச் செல்வன்

வன்னியரசுக்கு வாழ்த்துத் தெரிவித்த அதே வேளையில், கடந்த திமுக ஆட்சிக்காலத்தில் விசிக வென்றெடுத்த சாதனைகளைச் சிந்தனைச் செல்வன் நன்றியுடன் நினைவு கூர்ந்துள்ளார்.

தனது முகநூல் பதிவில் அவர் குறிப்பிட்டிருப்பதாவது:

“தேர்தல் தோல்வியின் போதுகூட கலங்காத என் மனம், இதை எழுதும் போது நன்றியால் கரைகிறது. எங்களது கோரிக்கைகளின் நியாயத்தை ஏற்று, அவற்றை அரசாணைகளாக மாற்றிய முன்னாள் முதலமைச்சர் அண்ணன் மு.க.ஸ்டாலினுக்கு எனது இதயம் நிறைந்த நன்றிகள். இந்த நன்றியைப் பதிவு செய்வது என் அரசியல் வாழ்வின் குறைந்தபட்ச அறம்.”

கடந்த திமுக ஆட்சியில் விசிக வென்றெடுத்த வரலாற்றுச் சாதனைகள் (2021 – 2026):

கடந்த ஐந்தாண்டுகளில் திமுக ஆட்சியில் விசிக போராடிப் பெற்ற முக்கிய அரசாணைகளின் பட்டியலைச் சிந்தனைச் செல்வன் வெளியிட்டுள்ளார்:

• SC/ST மாநில ஆணையம்: தேசிய ஆணையத்தைப் போல, தமிழ்நாட்டிலும் ‘SC/ST மாநில ஆணையம்’ சட்டம் 2021-ல் உருவாக்கப்பட்டது.
• நிதி ஒதுக்கீடு சட்டம்: தலித் மக்களுக்கான நிதி ஒதுக்கீட்டை உறுதி செய்ய ‘SC/ST விகாஸ் ஆக்‌ஷன் பிளான் சட்டம் 2024’ கொண்டு வரப்பட்டது.
• அரசு டெண்டர்களில் 5% முன்னுரிமை: அரசு ஒப்பந்தப் பணிகளில் எஸ்சி/எஸ்டி பிரிவினருக்கு 5% முன்னுரிமை வழங்க டெண்டர் சட்டத்தில் திருத்தம் செய்யப்பட்டது.
• அம்பேத்கர் தொழில் முன்னோடிகள் திட்டம்: எஸ்சி/எஸ்டி தொழில்முனைவோருக்கு 35% மானியத்துடன் (அதிகபட்சம் 1.5 கோடி) ஆண்டுக்கு 200 கோடி நிதி ஒதுக்கப்பட்டது.
• அயலக உயர் கல்வி உதவித் திட்டம்: சர்வதேசப் பல்கலைக்கழகங்களில் தலித் மாணவர்கள் பயில 24 லட்சம் முதல் 36 லட்சம் வரை நிதியுதவி வழங்கும் திட்டம் தொடங்கப்பட்டது.
• அயோத்திதாசர் குடியிருப்பு மேம்பாடு: பட்டியல் இனக் குடியிருப்புகளின் அடிப்படை வசதிகளுக்காக ஆண்டுக்கு 200 கோடி ரூபாய் ஒதுக்கப்பட்டது.
• வன்கொடுமைக்கு எதிரான தீருதவி உயர்வு: வன்கொடுமையால் பாதிக்கப்பட்ட குடும்பங்களுக்கான தீருதவித் தொகை 12 லட்சம் ரூபாயாக உயர்த்தப்பட்டது.
• 500 பேருக்கு அரசு வேலை: கடந்த கால வன்கொடுமை வழக்குகளில் பாதிக்கப்பட்ட குடும்பங்களின் வாரிசுகள் 500 பேருக்கு அரசு வேலை வழங்கப்பட்டது.
• ‘காலனி’ சொல் நீக்கம்: தலித் மக்களின் வசிப்பிடங்களை இழிவுபடுத்தும் ‘காலனி’ என்ற சொல் அரசு ஆவணங்களில் இருந்து நீக்கப்பட்டது.
• நாக்பூர் தீட்சபூமி புனிதப் பயணம்: அம்பேத்கர் பௌத்தம் தழுவிய நாக்பூர் நகருக்குச் செல்லும் தலித் மக்களுக்கு அரசு மானியம் வழங்கும் அரசாணை பிறப்பிக்கப்பட்டது.

வன்னியரசு வரலாறு படைப்பார்!

மேலும், சென்னை நந்தனத்தில் 50 கோடியில் எம்.சி.ராஜா கல்லூரி விடுதி, பரமக்குடியில் இமானுவேல் சேகரன் மணிமண்டபம், தூய்மைப் பணியாளர்களின் ஊதிய உயர்வு ஆகியவையும் இந்த பட்டியலில் இடம் பெற்றுள்ளன.

“இந்த சாதனைகளை விடப் பலமடங்கு சிறப்பாகத் தோழர் வன்னியரசு ஆதிதிராவிடர் நலத்துறை அமைச்சராகப் பணியாற்றி வரலாறு படைப்பார்” எனச் சிந்தனைச் செல்வன் தனது பதிவில் நம்பிக்கை தெரிவித்துள்ளார்.