காலையில் டெண்டர்; மாலையில் பணி ஆணை! புஸ்சி ஆனந்த் துறையில் அதிரடி காட்டிய 6 மணி நேர டெண்டர் சர்ச்சை!

தமிழகத்தில் புதிய ஆட்சிப் பொறுப்பேற்றுள்ள தவெக (தமிழக வெற்றிக் கழகம்) அரசின் ஊரக உள்ளாட்சித் துறையில், உலகிலேயே முதல்முறையாக காலையில் டெண்டர் கோரப்பட்டு, மாலையிலேயே பணி ஆணை (Work Order) வழங்கப்பட்ட வினோத சம்பவம் சமூக வலைதளங்களில் பெரும் புயலைக் கிளப்பியுள்ளது.

6 மணி நேரத்தில் முடிந்த இ-டெண்டர் நடைமுறை!

காஞ்சிபுரம் மாவட்டம், காஞ்சிபுரம் பஞ்சாயத்து யூனியன் வட்டார வளர்ச்சி அலுவலர் மூலமாக ஒரு அவசர இ-டெண்டர் (e-Tender) அறிவிப்பு வெளியிடப்பட்டது. காஞ்சிபுரம் மாவட்டம் கோனேரிகுப்பம் பஞ்சாயத்திற்கு உட்பட்ட காரப்பேட்டை கிராமத்தில், ரூ.16 லட்சத்து 83 ஆயிரத்து 194 மதிப்பீட்டில் 30 ஆயிரம் லிட்டர் கொள்ளளவு கொண்ட உயர்நிலை நீர்த்தேக்கத் தொட்டி (Overhead Water Tank) கட்டுவதற்காக இந்த ஒப்பந்தம் கோரப்பட்டிருந்தது.

இதில் ஆச்சரியம் என்னவென்றால்:

• நேற்று காலை 9:00 மணிக்கு டெண்டர் கோரும் அறிவிப்பு வெளியானது.
• விண்ணப்பிக்கக் கடைசி நேரம் அதே நாள் மாலை 3:00 மணி என நிர்ணயிக்கப்பட்டது.
• மாலை 4:00 மணிக்கு டெண்டர் ஓப்பன் செய்யப்பட்டு, அடுத்த ஒரு மணி நேரத்திற்குள் பணி ஆணை வழங்க திட்டமிடப்பட்டது.

அதாவது, விண்ணப்பிப்பதில் இருந்து பணி ஆணை வழங்குவது வரை ஒட்டுமொத்த டெண்டர் நடைமுறைகளும் வெறும் 6 மணி நேரத்திற்குள் முடிவடையும் வகையில் இந்த அறிவிப்பு வெளியிடப்பட்டிருந்தது. பொதுவாக இத்தகைய டெண்டர்களுக்குப் பத்திரிகைகளில் விளம்பரம் செய்யப்பட்டு, பல நாட்கள் அவகாசம் தரப்படும் நிலையில், இதற்கான எந்தவொரு விளம்பரமும் செய்யப்படவில்லை என்பது குறிப்பிடத்தக்கது.

அமைச்சர் புஸ்சி ஆனந்த் துறையின் ‘அதிசயம்’

தவெக தலைவர் விஜய் தனது தேர்தல் பிரசாரங்களின் போது, “தவெக ஆட்சிக்கு வந்தால் தூய சக்தி ஆட்சி நடைபெறும், ஒரு பைசா கூட ஊழல் நடக்காது, அனைத்தும் வெளிப்படையாக நடக்கும்” என்று உறுதியளித்திருந்தார். மக்கள் இதனை நம்பி வாக்களித்த நிலையில், புதிய ஊரக உள்ளாட்சித் துறை அமைச்சராகப் பொறுப்பேற்ற புஸ்சி ஆனந்த் பதவிக்கு வந்த 2 நாட்களிலேயே இந்த அதிரடி டெண்டர் சம்பவம் அரங்கேறியுள்ளது.

இதுபோன்ற குறுகிய கால அவகாச டெண்டர் தமிழக வரலாற்றிலேயே இதற்கு முன் நடந்தது இல்லை என்று உள்ளாட்சித் துறை அதிகாரிகளே வியப்புத் தெரிவித்துள்ளனர்.

சமூக வலைதள வைரலும், டெண்டர் ரத்தும்!

காலையில் தொடங்கி மாலையிலேயே முடியாத வேகத்தில் அரங்கேறிய இந்த 17 லட்சம் ரூபாய் டெண்டர் விவகாரம், சமூக வலைதளங்களில் கசிந்து கடுமையான விவாதப் பொருளாக மாறியது. எதிர்க்கட்சிகளும், நெட்டிசன்களும் தவெக அரசின் வெளிப்படைத்தன்மை குறித்துக் கேள்விகளை எழுப்பத் தொடங்கினர்.

நெருக்கடி முற்றியதைத் தொடர்ந்து, இந்த விவகாரம் முதலமைச்சர் விஜய்யின் கவனத்திற்குச் சென்றதாகக் கூறப்படுகிறது. இதையடுத்து, சமூக வலைதளங்களில் வைரலான அந்த சர்ச்சை நள்ளிரவில் உடனடியாக ரத்து செய்யப்படுவதாக அதிகாரப்பூர்வமாக அறிவிக்கப்பட்டுள்ளது.