“இந்திய நிலங்களை நேபாளமும் ஆக்கிரமித்துள்ளது!” எல்லைப் பிரச்சினையில் பிரிட்டனை இழுத்த பிரதமர் பாலேந்திர ஷா!
இந்தியா மற்றும் நேபாளம் (India-Nepal) நாடுகளுக்கு இடையே நீண்ட காலமாக எல்லைப் பிரச்சினைகள் நீடித்து வருகின்றன. குறிப்பாக லிபுலேக் (Lipulekh) மற்றும் லிம்பியாதுரா (Limpiyadhura) ஆகிய பகுதிகள் இரு நாடுகளுக்கும் இடையே பெரும் விவாதப் பொருளாக உள்ளன.
இந்தச் சூழ்நிலையில், இந்திய நிலங்களை நேபாளமும் ஆக்கிரமித்துள்ளது என்ற அதிரடித் தகவலை நேபாளப் பிரதமர் பாலேந்திர ஷா (Balendra Shah) அந்நாட்டு நாடாளுமன்றத்தில் வெளிப்படையாக ஒப்புக்கொண்டுள்ளார்.
“இரு நாடுகளுமே நிலங்களை ஆக்கிரமித்துள்ளன!” நாடாளுமன்றத்தில் ஒப்புதல்
நேபாள நாடாளுமன்றத்தில் ஷ்ரம் சமஸ்கிருதி கட்சியின் நாடாளுமன்ற உறுப்பினர் ஆரென் ராய் எழுப்பிய கேள்விக்கு, பிரதமர் பாலேந்திர ஷா பதிலளித்துப் பேசியதாவது:
“நான் நேபாளப் பிரதமராகப் பொறுப்பேற்ற பிறகுதான் ஒரு மிக முக்கிய உண்மையை அறிந்துகொண்டேன். இந்தியா மட்டும் நேபாளத்தின் நிலங்களை ஆக்கிரமிக்கவில்லை. நேபாளமும் இந்தியாவின் பல எல்லைப் பகுதிகளைத் தனது கட்டுப்பாட்டுக்குள் கொண்டு வந்து ஆக்கிரமித்துள்ளது.
எனவே, இந்த எல்லைப் பிரச்சினை குறித்து இரு நாடுகளும் நேருக்கு நேர் அமர்ந்து விரிவாக ஆராய வேண்டிய கட்டாயம் ஏற்பட்டுள்ளது.”
பிரிட்டன் மற்றும் சீனாவை பேச்சுவார்த்தைக்கு இழுக்கும் நேபாளம்!
நேபாள கம்யூனிஸ்ட் கட்சியின் (CPN-UML) துணைத் தலைவர் பத்மா ஆர்யல் எழுப்பிய கேள்விக்குப் பிரதமர் பாலேந்திர ஷா தொடர்ந்து விளக்கமளித்தார். இந்த எல்லைப் பிரச்சினையைத் தூதரக ரீதியிலான பேச்சுவார்த்தைகள் (Diplomatic Dialogue) மூலம் மட்டுமே தீர்க்க முடியும் என்று அவர் கூறினார்.
“நாங்கள் இந்த விவகாரம் குறித்து இந்தியா மற்றும் சீனாவுடன் மட்டும் பேசவில்லை. பிரிட்டன் (UK) அரசுடனும் அதிகாரப்பூர்வமாகப் பேசியுள்ளோம். பிரிட்டிஷ் இந்தியா இந்த பிராந்தியத்தை விட்டு வெளியேறிய காலத்திலிருந்தே இப்பிரச்சினை நீடிக்கிறது. எனவே, பிரிட்டன் அரசு இதில் தலையிட்டு மத்தியஸ்தம் (Mediation) செய்ய வேண்டும்” என்று பாலேந்திர ஷா புதிய குண்டைப் போட்டுள்ளார்.
வரலாற்று ஆய்வாளர்கள் குழுவை அமைக்க ஒப்புக்கொண்ட இந்தியா!
இந்த எல்லைப் பிரச்சினை தொடர்பாக நேபாள அரசு ஏற்கனவே இந்தியாவிற்கு அதிகாரப்பூர்வமான ராஜதந்திரக் குறிப்பை (Diplomatic Note) அனுப்பியுள்ளது. அதற்கு இந்திய அரசு அளித்துள்ள பதில் குறித்துப் பிரதமர் பாலேந்திர ஷா நாடாளுமன்றத்தில் விளக்கினார்.
“இரு நாட்டு அரசுகளும் இணைந்து வரலாற்று ஆய்வாளர்கள் (Historians), நில அளவையாளர்கள் (Surveyors) மற்றும் எல்லைப் பகுதி நிபுணர்களைக் கொண்ட ஒரு புதிய கூட்டுக்குழுவை அமைக்கும். அவர்கள் மூலமாகத் தூதரக மேஜைப் பேச்சுவார்த்தை நடத்தி இந்த எல்லைப் பிரச்சினைக்குத் தீர்வு காணத் தயாராக இருப்பதாக இந்தியா தெரிவித்துள்ளது” என்று அவர் சுட்டிக்காட்டியுள்ளார்.
