இந்தியாவில் கோடீஸ்வரர்கள் எண்ணிக்கை அதிரடி உயர்வு! ரூ.100 கோடிக்கு மேல் வருமானம் ஈட்டுவோர் 576 ஆக அதிகரிப்பு! நாடாளுமன்றத்தில் மத்திய அரசு தகவல்!

இந்தியாவில் ரூ.100 கோடிக்கும் அதிகமாக வருமானம் ஈட்டும் தனிநபர்களின் எண்ணிக்கை 576 ஆக உயர்ந்துள்ளதாக மத்திய அரசு தெரிவித்து உள்ளது.

கடந்த 5 ஆண்டுகளில் 4 மடங்கு அதிகரிப்பு; நாடாளுமன்றத்தில் நிதித் துறை இணை அமைச்சர் பங்கஜ் சவுத்ரி தகவல்!

வருமான வரித் தாக்கலின்படி உயர்ந்துள்ள கோடீஸ்வரர்கள் எண்ணிக்கையின் விவரங்கள் இதோ:

“ரூ.100 கோடி மற்றும் அதற்கு மேல் வருமானம் ஈட்டிய தனிநபர்களின் எண்ணிக்கை கடந்த 5 ஆண்டுகளில் 4 மடங்குக்கு மேல் அதிகரித்து உள்ளது.

இந்த எண்ணிக்கை 2022-23-ல் 301 ஆகவும், 2023-24-ல் 284 ஆகவும், 2024-25-ல் 415 ஆகவும் இருந்தது.

தற்போது 2025-26-ம் ஆண்டில் இந்த எண்ணிக்கை 576 ஆக உயர்ந்துள்ளது என நிதித் துறை இணை அமைச்சர் பங்கஜ் சவுத்ரி தெரிவித்துள்ளார்.”

சட்டத்தில் ‘கோடீஸ்வரர்’ வரையறை இல்லை; வேலையின்மை விகிதம் மற்றும் வறுமை குறைந்ததாக அரசு விளக்கம்!

பொருளாதார வளர்ச்சி மற்றும் சமூகச் சுட்டிகள் குறித்து மத்திய அரசு அளித்துள்ள தகவல்கள் வருமாறு:

• சட்டப்பூர்வ வரையறை: வருமான வரிச் சட்டம் 2025 அல்லது முந்தைய வருமான வரிச் சட்டம் 1961-ன் கீழ் ‘கோடீஸ்வரர்’ என்ற சொல்லுக்குச் சட்டப்பூர்வ வரையறை எதுவுமில்லை.
• சொத்து வரி ரத்து: 2016 ஏப்ரல் 1 முதல் ‘சொத்து வரிச் சட்டம் 1957’ ரத்து செய்யப்பட்டதால் கோடீஸ்வரர்களின் மொத்த சொத்து தரவுகளை அரசு பராமரிப்பதில்லை.
• ஏற்றத்தாழ்வு குறைவு: சமீபத்திய குடும்ப நுகர்வுச் செலவினக் கணக்கெடுப்பின்படி கிராமப்புறங்கள் மற்றும் நகர்ப்புறங்களில் வருமான ஏற்றத்தாழ்வு குறைந்துள்ளது.
• வேலையின்மை சரிவு: 15 வயதுக்கு மேற்பட்டோருக்கான வேலையின்மை விகிதம் 2022-ல் 3.6 சதவீதமாக இருந்து, 2025-ல் 3.1 சதவீதமாகக் குறைந்துள்ளது.
• வளர்ச்சித் திட்டங்கள்: நலத்திட்டங்கள், ஸ்டார்ட்-அப் ஆதரவு மற்றும் வேலைவாய்ப்புடன் இணைக்கப்பட்ட வரிச் சலுகைகள் மூலம் உள்ளடக்கிய பொருளாதார வளர்ச்சியை அரசு ஊக்குவிக்கிறது.

கடந்த பத்தாண்டுகளில் நிதி ஆயோக் தரவுகளின்படி வறுமையும் குறிப்பிடத்தக்க அளவில் குறைந்துள்ளதாக மத்திய அரசு நாடாளுமன்றத்தில் தெரிவித்துள்ளது.