வெனிசுலாவில் அடுத்தடுத்து சக்திவாய்ந்த பூகம்பம்: நகரங்கள் நிலைகுலைவு, நாடு முழுவதும் அவசரநிலை
கராகஸ்: லத்தீன் அமெரிக்க நாடான வெனிசுலாவில் அடுத்தடுத்து ஏற்பட்ட சக்திவாய்ந்த இரட்டை நிலநடுக்கங்கள் பெரும் அழிவை ஏற்படுத்தியுள்ளதாக தகவல்கள் வெளியாகியுள்ளன. தலைநகர் கராகஸ் உள்ளிட்ட பல முக்கிய நகரங்கள் கடுமையாக பாதிக்கப்பட்டுள்ள நிலையில், நாடு முழுவதும் அவசரநிலை அறிவிக்கப்பட்டுள்ளது.
வியாழக்கிழமை மாலை ஏற்பட்ட இந்த நிலநடுக்கங்கள் ரிக்டர் அளவுகோலில் 7.2 மற்றும் 7.5 என பதிவாகியுள்ளன. வெறும் 39 விநாடிகள் இடைவெளியில் ஏற்பட்ட இந்த அதிர்வுகள் காரணமாக கரீபியன் கடலோரப் பகுதிகளில் சுனாமி எச்சரிக்கையும் விடுக்கப்பட்டு பின்னர் திரும்பப் பெறப்பட்டது.
நிலநடுக்கத்தால் ஏற்பட்ட சேதத்தின் முழுமையான விவரங்கள் இன்னும் வெளியாகாத நிலையில், உயிரிழப்புகள் ஆயிரக்கணக்கில் இருக்கக்கூடும் என அச்சம் நிலவுகிறது. அமெரிக்க புவியியல் ஆய்வு மையத்தின் ஆரம்பகட்ட மதிப்பீட்டின்படி, இந்த பேரிடரில் 10,000 முதல் 1 லட்சம் பேர் வரை உயிரிழந்திருக்கலாம் என கூறப்படுகிறது.
தலைநகர் கராகஸில் பல அடுக்குமாடி குடியிருப்புகள், வணிக வளாகங்கள் மற்றும் கட்டிடங்கள் இடிந்து விழுந்துள்ளன. இதனால் நகரின் பல பகுதிகள் தூசி மண்டலமாக மாறியுள்ளன. உயிர் தப்பிய மக்கள் வீதிகளில் அச்சத்துடன் தஞ்சமடைந்துள்ளதுடன், இடிபாடுகளுக்குள் சிக்கியுள்ள உறவினர்களை தேடும் பணியிலும் ஈடுபட்டுள்ளனர்.
மீட்புப் படையினர், தேசிய பாதுகாப்பு அமைப்புகள் மற்றும் தன்னார்வலர்கள் இணைந்து இடிபாடுகளை அகற்றி உயிருடன் இருப்பவர்களை மீட்கும் பணியை தீவிரப்படுத்தியுள்ளனர். இதற்கிடையில், நாட்டின் முக்கிய சர்வதேச நுழைவாயிலான சைமன் பொலிவர் சர்வதேச விமான நிலையம் சேதமடைந்ததால் தற்காலிகமாக மூடப்பட்டுள்ளது.
நிலநடுக்கத்துக்குப் பிறகு 4.9 முதல் 6.4 ரிக்டர் அளவிலான 20-க்கும் மேற்பட்ட பிந்தைய அதிர்வுகள் பதிவாகியுள்ளதால், மக்கள் வீடுகளுக்குள் செல்ல அச்சமடைந்து திறந்தவெளி பகுதிகளில் தங்கியுள்ளனர்.
நாட்டின் நிலைமையை கருத்தில் கொண்டு, வெனிசுலா இடைக்கால அதிபர் டெல்சி ரோட்ரிக்ஸ் நாடு முழுவதும் அவசரநிலையை அறிவித்துள்ளார். மேலும், மீட்பு மற்றும் நிவாரணப் பணிகள் போர்க்கால அடிப்படையில் முன்னெடுக்கப்படுவதாகவும் அவர் தெரிவித்துள்ளார்.
இந்த பேரிடரின் முழு பாதிப்பு மற்றும் உயிரிழப்புகள் குறித்த அதிகாரப்பூர்வ தகவல்கள் அடுத்த சில நாட்களில் வெளியாகும் என எதிர்பார்க்கப்படுகிறது.
