வாஷிங்டன்: உலகின் இரு பெரும் அணுசக்தி நாடுகளான அமெரிக்கா மற்றும் ரஷ்யா இடையிலான கடைசி முக்கிய அணு ஆயுதக் கட்டுப்பாட்டு ஒப்பந்தமான ‘நியூ ஸ்டார்ட்’ வரும் பிப்ரவரி 5, 2026 அன்று காலாவதியாகிறது. இது குறித்து எவ்விதக் கவலையும் தெரிவிக்காத அதிபர் டிரம்ப், “புதிய மற்றும் சிறந்த ஒப்பந்தத்தை உருவாக்குவோம்” என்று அறிவித்துள்ளார்.
டிரம்பின் ‘முக்கோண’ திட்டம்:
தற்போதைய ஒப்பந்தம் அமெரிக்கா மற்றும் ரஷ்யாவை மட்டுமே கட்டுப்படுத்துகிறது. ஆனால், வளர்ந்து வரும் அணு ஆயுத சக்தியான சீனாவையும் புதிய ஒப்பந்தத்தில் ஒரு அங்கமாகச் சேர்க்க வேண்டும் என்பதில் டிரம்ப் உறுதியாக உள்ளார்.
சீனாவின் கடும் எதிர்ப்பு:
டிரம்பின் இந்தத் திட்டத்தைச் சீனா முற்றிலுமாக நிராகரித்துள்ளது.
- பெய்ஜிங் வாதம்: “அமெரிக்கா மற்றும் ரஷ்யாவுடன் எங்களை ஒப்பிடுவது நியாயமற்றது. எங்களின் அணு ஆயுதக் கிடங்கு மிகக் குறைவானது” என்று வாஷிங்டனில் உள்ள சீனத் தூதரகம் தெரிவித்துள்ளது.
- தேசிய பாதுகாப்பு: சீனா தனது பாதுகாப்பிற்குத் தேவையான குறைந்தபட்ச அளவிலேயே அணுசக்தி வலிமையை வைத்துள்ளது என்று சீனா விளக்கம் அளித்துள்ளது.
“எனது மனசாட்சியே எல்லை”: டிரம்பின் அதிரடிப் பேச்சு:
சர்வதேச சட்டங்கள் குறித்துக் கேட்கப்பட்ட கேள்விக்கு டிரம்ப் வியக்கத்தக்க பதிலளித்துள்ளார்:
“என்னை நிறுத்தக்கூடிய ஒரே விஷயம் எனது சொந்த அறநெறியும் (Morality), எனது மனமும் மட்டுமே. எனக்கு சர்வதேசச் சட்டம் தேவையில்லை”.
தைவான் மற்றும் வெனிசுலா விவகாரம்:
வெனிசுலா மீதான அமெரிக்கத் தாக்குதல், தைவான் மீதான சீனாவின் நடவடிக்கைக்கு முன்னுதாரணமாகுமா என்ற கேள்விக்கு, வெனிசுலா ஒரு “உண்மையான அச்சுறுத்தல்” என்று டிரம்ப் பதிலளித்தார். மேலும், தைவான் விவகாரத்தில் சீனா ஏதேனும் நடவடிக்கை எடுத்தால் தான் “மிகவும் அதிருப்தி” அடைவேன் என்றும் எச்சரித்துள்ளார்.
