“தெற்கைத் தொடாதே!” – தொகுதி மறுவரையறை விவகாரத்தில் பிரதமர் மோடிக்கு முதல்வர் ஸ்டாலின் 5 நேரடி கேள்விகள்.
Apr 8, 2026
சென்னை | ஏப்ரல் 8, 2026
இந்தியாவின் கூட்டாட்சித் தத்துவத்தைச் சிதைக்கும் வகையில் மத்திய பாஜக அரசு செயல்படுவதாகக் குற்றம் சாட்டியுள்ள தமிழக முதல்வர் மு.க. ஸ்டாலின், தொகுதி மறுவரையறை மூலம் தென்னிந்திய மாநிலங்களின் அரசியல் உரிமைகளைப் பறிக்க நடக்கும் முயற்சியை “சர்வாதிகாரம்” எனச் சாடியுள்ளார்.
முதல்வர் ஸ்டாலின் முன்வைக்கும் 5 அனல் பறக்கும் கேள்விகள்:
- ரகசியம் காப்பது ஏன்?: தொகுதி மறுவரையறையை எப்படி நடத்தப் போகிறார்கள் என்ற விவரங்களை வெளியிடாமல், மத்திய அரசு இதுவரை ரகசியம் காப்பது ஏன்?
- வாஜ்பாய் வழியைப் பின்பற்றுவீர்களா?: 2001-ல் முன்னாள் பிரதமர் வாஜ்பாய் அவர்கள் மக்கள் தொகைக் கட்டுப்பாட்டை வெற்றிகரமாகச் செய்த மாநிலங்கள் பாதிக்கப்படக் கூடாது என்பதற்காக மறுவரையறையை 25 ஆண்டுகள் தள்ளிவைத்தார். அதேபோல தற்போதைய பிரதமர் மோடி செய்வாரா?
- ஏப்ரல் 29-க்கு பின் ஏன் கூட்டக் கூடாது?: நாடாளுமன்றச் சிறப்புக் கூட்டத்தொடரை ஏப்ரல் 29-க்குப் பிறகு கூட்ட வேண்டும் என்ற எதிர்க்கட்சிகளின் கோரிக்கையை நிராகரிப்பதில் மறைந்துள்ள மர்மம் என்ன?
- சிறப்புக் கூட்டத்தொடரின் அவசரம் என்ன?: 5 மாநிலத் தேர்தல்கள் (தமிழ்நாடு, கேரளா உட்பட) நடைபெறும் சூழலில், அவசர அவசரமாக நாடாளுமன்றத்தைக் கூட்டுவது தேர்தல் ஆதாயத்திற்காகவா?
- அனைத்துக் கட்சிக் கூட்டம் எங்கே?: இவ்வளவு பெரிய அரசியலமைப்பு மாற்றத்தைச் செய்யும் முன்பு அனைத்துக் கட்சிகளையும் அழைத்து ஆலோசிக்காதது ஏன்?
திமுகவின் எச்சரிக்கை: “புயலாக மாறும் தெற்கு!”
தென் மாநிலங்கள் மக்கள் தொகையைக் கட்டுப்படுத்தி நாட்டின் வளர்ச்சிக்கு வித்திட்டுள்ளன. ஆனால், மக்கள் தொகை அதிகமாக உள்ள வட மாநிலங்களுக்கு அதிக நாடாளுமன்ற இடங்களை வழங்கி, தெற்கு மாநிலங்களின் வலிமையைக் குறைப்பது அநீதி என ஸ்டாலின் குறிப்பிட்டுள்ளார்.
“எங்கள் அனுமதியின்றி, எங்களோடு பேசாமல் எடுக்கப்படும் எந்த முடிவுக்கும் உயிரே போனாலும் உடன்பட மாட்டோம். தென்றலாக இருக்கும் தெற்கைப் புயலாக மாற்றாதீர்கள்!” என அவர் இறுதி எச்சரிக்கை விடுத்துள்ளார்.
