போர் நிறுத்தம் சாத்தியமா? ரஷ்யா-உக்ரைன் இடையே இரண்டாம் கட்ட பேச்சுவார்த்தை இன்று நடைபெறுகிறது!

இஸ்தான்புல்: ரஷ்யா-உக்ரைன் இடையே நீடித்துவரும் போருக்கு முடிவை காண அமெரிக்கா தொடர்ந்து அழுத்தம் கொடுத்து வருகிறது. இந்த சூழ்நிலையில், இரு நாடுகளும் இன்று (ஜூன் 2) இரண்டாவது கட்ட நேரடி பேச்சுவார்த்தையில் ஈடுபட உள்ளன. 2022ம் ஆண்டு பிறகு, இருதரப்பும் நேரிலான இரண்டாம் கட்ட பேச்சுவார்த்தையில் ஈடுபடுவது இதுவே முதன்முறையாகும்.

இந்த பேச்சுவார்த்தை, துருக்கியின் தலைநகர் இஸ்தான்புல்லில் நடைபெறுகிறது. உக்ரைன் தரப்பிலிருந்து, பாதுகாப்பு அமைச்சர் ருஸ்டெம் உமெரோவ் தலைமையிலான குழு பங்கேற்கிறது. ஆனால் ரஷ்யா தரப்பில் யார் கலந்து கொள்கிறார்கள் என்பது இன்னும் உறுதி செய்யப்படவில்லை.

முந்தைய பேச்சுவார்த்தையின் முன்னோடி:

கடந்த மே 16ஆம் தேதி, இருதரப்பும் முதல் கட்ட பேச்சுவார்த்தையில் சந்தித்தன. இதில் போர் நிறுத்த ஒப்பந்தம் எட்டப்படவில்லை என்றாலும், போர் கைதிகள் பரிமாற்றம் செய்யும் புரிந்துணர்வு உருவானது. அதன்படி இரு நாடுகளும் தங்கள் பிடியில் இருந்த போர் கைதிகளை பரிமாறிக்கொண்டன. இது ஒரு நல்ல முன்னேற்றமாக கருதப்பட்டது.

முக்கிய சந்தேகம் – உண்மையிலேயே போர் நிறுத்தம் சாத்தியமா?

இந்த பேச்சுவார்த்தையைச் சுற்றி எதிர்பார்ப்புகளும் சந்தேகங்களும் எழுந்துள்ளன. பேச்சுவார்த்தை நடைபெற உள்ள நாளையன்று, உக்ரைன் ரஷ்யாவின் நான்கு விமானப்படை தளங்களை ட்ரோன் மூலம் தாக்கியது. 700 முதல் 4000 கி.மீ. தொலைவில் உள்ள ரஷ்ய விமான தளங்கள் தாக்கப்பட்டதாக கூறப்படுகிறது. இது, ரஷ்யாவுக்கு பெரும் அவமதிப்பாகும். எனவே, இந்தத் தாக்குதலுக்குப் பதிலடி அளிக்க ரஷ்யா தயங்காது என்பது வெளிப்படையாகத் தெரிகிறது.

இந்த நிலையில், பேச்சுவார்த்தையில் சமாதானம் காணப்படும் வாய்ப்பு குறைவாகவே உள்ளதாக நிபுணர்கள் கருதுகின்றனர். மேலும், “பிள்ளையை கிள்ளிவிட்டு தொட்டிலை ஆட்டும்” போல, ஒரு புறம் போரை நிறுத்த வேண்டும் என பேச்சுவார்த்தையில் பங்கேற்கும் உக்ரைன், மறுபுறம் ரஷ்யாவின் உள்நாட்டுப் படை தளங்களை தாக்குவது சரியானதா? என்ற விமர்சனங்களும் எழுந்துள்ளன.

போருக்கான பின்னணி:

உக்ரைன், முந்தைய சோவியத் யூனியனின் ஒரு பகுதியாக இருந்தது. 1990களில் சோவியத் யூனியன் குழிந்து, உக்ரைன் தனி நாடாக உருவாகியது. ஆரம்பத்தில் ரஷ்யாவுடன் மிகுந்த பிரச்சனைகள் இல்லை. ஆனால், உக்ரைன் அமெரிக்காவுடன் நட்புறவை வளர்த்து, நேட்டோவில் இணைய முயற்சிக்க தொடங்கியதும் நிலைமை மாறியது.

நேட்டோவில் உக்ரைன் இணையும்போது, அமெரிக்க மற்றும் மேற்கத்திய படைகள் ரஷ்ய எல்லையில் நிலைநிறுத்தப்படும் என்ற பயம் ரஷ்யாவுக்கு ஏற்பட்டது. அதனால் தான், உக்ரைன் நேட்டோவில் இணையக் கூடாது என்பது ரஷ்யாவின் முக்கிய கோரிக்கையாக இருக்கிறது. உக்ரைன் அதனை ஏற்க மறுத்ததால்தான், இந்த போர் வெடித்தது.