மாணவர்கள் தற்கொலை: பத்தாண்டுகளில் 65% அதிகரிப்பு – உச்ச நீதிமன்றத்தின் 9 ‘Binding’ வழிகாட்டுதல்கள்!

டெல்லி / சென்னை | ஜனவரி 27, 2026: இந்தியாவில் கல்வி அழுத்தம் மற்றும் மன உளைச்சல் காரணமாக மாணவர்கள் தற்கொலை செய்துகொள்வது ஒரு “தேசிய நெருக்கடியாக” உருவெடுத்துள்ளது. கடந்த 2013-ஆம் ஆண்டுடன் ஒப்பிடுகையில், மாணவர்களின் தற்கொலை விகிதம் கடந்த 10 ஆண்டுகளில் 65 சதவீதம் அதிகரித்துள்ளதாகத் தேசிய குற்ற ஆவணக் காப்பகம் (NCRB) அதிர்ச்சித் தகவலை வெளியிட்டுள்ளது.

புள்ளிவிவரங்கள் சொல்லும் அபாயம்:

• 2013-ல் மாணவர்கள் தற்கொலை: 8,423
• 2023-ல் மாணவர்கள் தற்கொலை: 13,892 (மொத்த தற்கொலைகளில் 8.1%)
• உயர் கல்வி நிறுவனங்களில் பாதிப்பு: 2018 முதல் 2023 வரை ஐஐடி (IIT) – 33 பேர், என்ஐடி (NIT) – 24 பேர் தற்கொலை செய்துகொண்டுள்ளனர்.

உச்ச நீதிமன்றத்தின் 9 அதிரடி வழிகாட்டுதல்கள்:

ஓய்வுபெற்ற நீதிபதி எஸ். ரவீந்திர பட் தலைமையிலான தேசிய பணிக் குழுவின் பரிந்துரையின் பேரில், நீதிபதிகள் ஜெ.பி. பார்திவாலா மற்றும் அரங்க மகாதேவன் அடங்கிய அமர்வு கடந்த ஜனவரி 15, 2026 அன்று 9 முக்கிய உத்தரவுகளைப் பிறப்பித்துள்ளது:

1. கட்டாயப் புகார்: ஒரு மாணவர் தற்கொலை செய்துகொண்டால், அது நடந்த இடம் எதுவாக இருந்தாலும் (வளாகம், விடுதி அல்லது வெளிப்பகுதி) கல்வி நிறுவனம் உடனடியாகப் போலீசாருக்குத் தகவல் தெரிவிக்க வேண்டும்.
2. பணியிடங்களை நிரப்புதல்: நான்கு மாதங்களுக்குள் அனைத்து காலிப் பேராசிரியர் பணியிடங்களையும் அரசு மற்றும் தனியார் நிறுவனங்கள் நிரப்ப வேண்டும்.
3. துணைவேந்தர் நியமனம்: துணைவேந்தர் மற்றும் பதிவாளர் பதவிகள் காலியான ஒரு மாதத்திற்குள் புதியவர்களை நியமிக்க வேண்டும்.
4. கல்வி உதவித் தொகை: நிலுவையில் உள்ள அனைத்து கல்வி உதவித் தொகைகளையும் (Scholarship) மத்திய, மாநில அரசுகள் நான்கு மாதங்களுக்குள் வழங்க வேண்டும்.
5. மனநல ஆலோசகர்கள்: 100 மாணவர்களுக்கு மேல் உள்ள அனைத்து கல்வி நிறுவனங்களிலும் தகுதி வாய்ந்த மனநல ஆலோசகர்கள் நியமிக்கப்பட வேண்டும்.
6. 24 மணி நேர மருத்துவ உதவி: தங்கிப் படிக்கும் நிறுவனங்களில் 24 மணி நேரமும் மருத்துவ உதவி கிடைப்பதை உறுதி செய்ய வேண்டும்.
7. பிரிவினையைத் தவிர்த்தல்: மாணவர்களை மதிப்பெண் அடிப்படையில் தனித்தனி பிரிவுகளாகப் (Batch Segregation) பிரிப்பது மற்றும் பொதுவெளியில் அவமானப்படுத்துவது முற்றிலும் தடை செய்யப்படுகிறது.
8. பாதுகாப்பு வசதிகள்: விடுதிகளில் தற்கொலையைத் தூண்டும் வாய்ப்புள்ள கூரை மின்விசிறிகள் மற்றும் மொட்டை மாடி அணுகுமுறைகளில் பாதுகாப்பு மாற்றங்களைச் செய்ய வேண்டும்.
9. தார்மீகப் பொறுப்பு: மாணவர்கள் தற்கொலைக்குக் கல்வி நிறுவனங்களின் நிர்வாகச் சீர்கேடும் ஒரு காரணம் என்பதால், இனி கல்வி நிறுவனங்களே இதற்குத் தார்மீகப் பொறுப்பேற்க வேண்டும்.