காங்., ஏஐஎம்ஐஎம் ஆதரவுடன் பாஜக வெற்றி: மகா​ராஷ்டிர முதல்வர் தேவேந்​திர பட்​னா​விஸ் கடும் எச்சரிக்கை!

மும்பை: மகா​ராஷ்டிராவில் சமீபத்தில் நடைபெற்ற நகராட்சி தலைவர் தேர்தல்களில், பாஜக வேட்பாளர்கள் அதன் பரம எதிரிகளான காங்கிரஸ் மற்றும் ஏஐஎம்ஐஎம் கட்சிகளின் ஆதரவுடன் வெற்றி பெற்றிருப்பது அம்மாநில அரசியலில் பெரும் அதிர்வலைகளை ஏற்படுத்தியுள்ளது. இந்த விவகாரத்தில் தன்னிச்சையாக முடிவெடுத்த உள்ளூர் தலைவர்கள் மீது கடும் நடவடிக்கை எடுக்கப்படும் என முதல்வர் தேவேந்திர பட்னாவிஸ் எச்சரித்துள்ளார்.

அம்பர்நாத் நகராட்சி: சிவசேனாவை ஓரங்கட்டிய பாஜக – காங்கிரஸ் கூட்டணி

தானே மாவட்டத்தில் உள்ள 60 உறுப்பினர்களைக் கொண்ட அம்பர்நாத் நகராட்சிக்கு கடந்த டிசம்பர் 20-ம் தேதி தேர்தல் நடைபெற்றது. இதில் ஏக்நாத் ஷிண்டே தலைமையிலான சிவசேனா 27 இடங்களில் வெற்றி பெற்று தனிப்பெரும் கட்சியாக உருவெடுத்தது. ஆனால், ஆட்சி அமைக்கத் தேவையான பெரும்பான்மைக்கு (31 இடங்கள்) 4 இடங்கள் குறைவாக இருந்தது.

இந்நிலையில், 14 இடங்களை வைத்திருந்த பாஜக, காங்கிரஸ் (12 இடங்கள்), அஜித் பவாரின் என்சிபி (4 இடங்கள்) மற்றும் சுயேச்சைகளுடன் இணைந்து ‘அம்பர்நாத் விகாஸ் அகாதி’ என்ற கூட்டணியை உருவாக்கி, பாஜகவின் தேஜஸ்ரீ கரஞ்சுலே பாட்டீலை நகராட்சித் தலைவராக்கியது. தங்களின் ஆளுங்கட்சி கூட்டாளியான சிவசேனாவை ஓரங்கட்டிவிட்டு காங்கிரஸுடன் பாஜக கைகோர்த்தது பெரும் சர்ச்சையை கிளப்பியது.

அகோட் நகராட்சி: பாஜக – ஏஐஎம்ஐஎம் ‘திடீர்’ நட்பு

இதேபோல அகோலா மாவட்டத்தில் உள்ள 35 உறுப்பினர்களைக் கொண்ட அகோட் நகராட்சியில், பாஜக 11 இடங்களில் மட்டுமே வெற்றி பெற்றிருந்தது. அங்கு அசாத்துதீன் ஒவைசியின் ஏஐஎம்ஐஎம் (AIMIM) கட்சியின் 2 உறுப்பினர்கள் மற்றும் இதர கட்சிகளின் ஆதரவுடன் பாஜக வேட்பாளர் தலைவர் பதவியைக் கைப்பற்றினார். சித்தாந்த ரீதியாக நேரெதிர் துருவங்களாக இருக்கும் பாஜகவும் ஏஐஎம்ஐஎம்-மும் இணைந்தது அரசியல் வட்டாரத்தில் வியப்பை ஏற்படுத்தியது.

முதல்வர் பட்னாவிஸின் அதிரடி எச்சரிக்கை:

இந்த விவகாரம் குறித்துப் பேசிய முதல்வர் தேவேந்திர பட்னாவிஸ், “காங்கிரஸ் மற்றும் ஏஐஎம்ஐஎம் கட்சிகளுடன் கூட்டு சேர்ந்து நகராட்சித் தலைவரைக் கைப்பற்றியதை ஒருபோதும் ஏற்றுக்கொள்ள முடியாது. இது கட்சியின் ஒழுக்கத்திற்கு எதிரானது. மேலிட அனுமதியின்றி தன்னிச்சையாகச் செயல்பட்ட உள்ளூர் தலைவர்கள் மீது கடும் நடவடிக்கை எடுக்கப்படும்” எனத் திட்டவட்டமாகத் தெரிவித்தார்.

எதிர்க்கட்சிகளின் விமர்சனம்:

சிவசேனா (உத்தவ்) எம்பி சஞ்சய் ராவத் பாஜகவைக் கடுமையாகச் சாடினார். “காங்கிரஸ் இல்லாத பாரதம் என்று முழக்கமிடும் பாஜக, அதிகாரத்திற்காக யாருடன் வேண்டுமானாலும் கூட்டணி அமைக்கும் என்பதை இந்தச் சம்பவம் காட்டுகிறது. இது பாஜகவின் இரட்டை வேடத்தை அம்பலப்படுத்துகிறது” என்றார்.

காங்கிரஸ் நடவடிக்கை:

இந்த விவகாரத்தில் பாஜகவுக்கு ஆதரவளித்த 12 காங்கிரஸ் உறுப்பினர்களையும், அக்கட்சியின் பிளாக் தலைவரையும் காங்கிரஸ் மேலிடம் உடனடியாக சஸ்பெண்ட் செய்துள்ளது. மேலும் அம்பர்நாத் பிளாக் காங்கிரஸ் கமிட்டியையும் கலைத்து உத்தரவிட்டுள்ளது.