தமிழக பட்ஜெட் 2026-27 முக்கிய அம்சங்கள்! மாணவர்களுக்கு இலவச மடிக்கணினி; ‘அண்ணனின் சீர்’ தங்கம் அறிவிப்பு!

தமிழக சட்டப்பேரவையில் 2026-27 நிதியாண்டிற்கான பொது பட்ஜெட்டை நிதியமைச்சர் மரிய வில்சன் தாக்கல் செய்தார்.

“10 தூண்கள் கொண்ட வெற்றித் தமிழகம்!” – நிதியமைச்சர் மரிய வில்சன் உரை!

பட்ஜெட் உரையின் தொடக்கம் மற்றும் தொலைநோக்குத் திட்டம் இதோ:

“முதல்வர் விஜய் தலைமையிலான அரசு பொறுப்பேற்ற இந்த குறுகிய காலத்தில் பல துறைகளில் கணிசமான முன்னேற்றங்கள் ஏற்பட்டுள்ளன.

தமிழக வெற்றிக் கழகத்தின் வெற்றி ஒட்டுமொத்த தமிழக மக்களின் வெற்றியாகும்.

அறம், பொருள், இன்பத்தை நோக்கமாக வைத்து 10 தூண்கள் கொண்ட ‘வெற்றித் தமிழகம்’ திட்ட ஆவணம் வெளியிடப்பட்டுள்ளது.

முதலாம், மூன்றாம், ஐந்தாம் ஆண்டுக்குள் நிறைவேற்றத்தக்க திட்டங்கள் வகைப்படுத்தப்பட்டுச் செயல்படுத்தப்பட்டு வருகின்றன.”

கல்வி, மாணவர்கள் மற்றும் இளைஞர் நலன்!

கல்வித்துறைக்கு அறிவிக்கப்பட்ட முக்கியத் திட்டங்கள் வருமாறு:

• வெற்றி மடிக்கணினி திட்டம்: கல்லூரி மாணவர்களுக்கு ரூ.2,000 கோடியில் ‘வெற்றி மடிக்கணினி திட்டம்’ செயல்படுத்தப்படும்.
• காலை உணவுத் திட்டம்: பெருந்தலைவர் காமராசர் காலை உணவுத் திட்டம் 6-8 ஆம் வகுப்புகளுக்குத் விரிவாக்கம் செய்யப்படும்.
• பள்ளிக்கல்வித் துறை: பள்ளிக் கல்வித் துறைக்கு ரூ.44,527 கோடியும், உயர்கல்வித் துறைக்கு ரூ.8,393 கோடியும் ஒதுக்கீடு செய்யப்பட்டுள்ளது.
• மாணவர் சலுகைகள்: 11-ம் வகுப்பு மாணவர்களுக்கு ஹெல்மெட், குடிநீர் பாட்டில் வசதி கொண்ட சைக்கிள்கள் ரூ.277 கோடியில் வழங்கப்படும்.
• அம்பேத்கர் உதவித்தொகை: அண்ணல் அம்பேத்கர் அயல்நாட்டுக் கல்வி உதவித் தொகைத் திட்டத்திற்கு ரூ.131 கோடி ஒதுக்கீடு செய்யப்படுகிறது.

பெண்கள், சமூக நலன் மற்றும் திருநர் நலன்!

பெண்கள் மற்றும் சமூக பாதுகாப்பு சார்ந்த அறிவிப்புகள் இதோ:

• அண்ணனின் சீர் திட்டம்: பெண்களின் திருமண நன்னாளில் 8 கிராம் தங்க நாணயம் மற்றும் பட்டுப்புடவை வழங்க ரூ.812 கோடி ஒதுக்கீடு செய்யப்படுகிறது.
• மண்ணின் மகள் திட்டம்: ஆதிதிராவிடர், பழங்குடியின விவசாயத் தொழிலாளர் பெண்களுக்கு ‘மண்ணின் மகள் திட்டம்’ மூலம் நில உரிமை வழங்கப்படும்.
• திருநர் நலன்: மாற்று பாலினத்தவருக்குச் சுயதொழில் கடன் மானியமும், 5 மாவட்டங்களில் ‘அரண்’ தங்குமிடங்களும் அமைக்கப்படும்.
• ஹஜ் பயண மானியம்: சிறுபான்மையினருக்கான ஹஜ் பயண மானியம் ரூ.25,000-ல் இருந்து ரூ.35,000 ஆக உயர்த்தப்பட்டுள்ளது.

உள்கட்டமைப்பு, போக்குவரத்து மற்றும் மின்சாரம்!

நகர்ப்புற வளர்ச்சி மற்றும் போக்குவரத்துத் துறை திட்டங்கள் வருமாறு:

• புதிய மெட்ரோ பாதைகள்: சென்னையில் விமான நிலையம்-கிளாம்பாக்கம், கோயம்பேடு-பட்டாபிராம், பூந்தமல்லி-சுங்குவார்சத்திரம் என 3 புதிய மெட்ரோ பாதைகள் பரிந்துரைக்கப்படும்.
• மின்சாரப் பேருந்துகள்: சென்னைக்கு 1,000 புதிய AC மின்சாரப் பேருந்துகள் வாங்கப்படும்.
• MY-HOME திட்டம்: சென்னையில் ரூ.15,000 கோடி முதலீட்டில் 1 லட்சம் குறைந்த வருமான வீடுகள் கட்டப்படும்.
• வீட்டுக் கூரை சூரிய மின் திட்டம்: சூரிய மின்பலகைக்கு ரூ.1 லட்சம் வரை மானியம் வழங்க ரூ.50 கோடி ஒதுக்கீடு செய்யப்படுகிறது.
• கூவம், அடையாறு சீரமைப்பு: கூவம் மற்றும் அடையாறு ஆறுகள் உலகத் தரத்தில் படகு சவாரியுடன் மறுசீரமைப்பு செய்யப்படும்.

தொழில்நுட்பம், AI மற்றும் மின்சாரத் துறை!

டிஜிட்டல் மற்றும் மின் ஆளுமை சார்ந்த அறிவிப்புகள் இதோ:

• TN AI Mission: செயற்கை நுண்ணறிவு அமைப்பு மூலம் சுகாதாரம், விவசாயம், கல்வியில் சிறப்பு கவனம் செலுத்தப்படும்.
• SPEED தளம்: வெளிப்படையான இணையவழி திட்ட அனுமதிக்கு SPEED தளம் ரூ.40 கோடியில் அறிமுகப்படுத்தப்படும்.
• ஸ்மார்ட் மீட்டர்கள்: சென்னை நுகர்வோருக்கும், பிற பகுதிகளில் 50 லட்சம் வணிக நுகர்வோருக்கும் ஸ்மார்ட் மீட்டர்கள் வழங்கப்படும்.
• EV சார்ஜிங் நிலையங்கள்: 5 ஆண்டுகளில் 20,000 பொது EV சார்ஜிங் நிலையங்கள் ரூ.50 கோடியில் அமைக்கப்படும்.