2 சீட்டுகளைத் தள்ளி வைத்த முதலமைச்சர் விஜய்! விசிக, முஸ்லீம் லீக் கட்சிகளுக்கு ஒதுக்கப்படும் முக்கியத் துறைகள்!

முதலமைச்சர் விஜய் தலைமையிலான தவெக அரசு, இன்று தனது புதிய அமைச்சரவையை விரிவாக்கம் செய்துள்ளது. மொத்தம் 23 புதிய அமைச்சர்கள் இன்று பொறுப்பேற்றுள்ளனர். அவர்களின் துறைகளும் அதிகாரப்பூர்வமாக ஒதுக்கீடு செய்யப்பட்டுள்ளன.

ஆனால், இந்த ஒட்டுமொத்த ஒதுக்கீட்டிலும் இரண்டு மிக முக்கியமான துறைகள் யாருக்கும் ஒதுக்கப்படவில்லை. அவை இன்னும் காலியாகவே வைக்கப்பட்டுள்ளன. இது தமிழக அரசியல் வட்டாரத்தில் பெரும் விவாதத்தைக் கிளப்பியுள்ளது.

காலியாக வைக்கப்பட்டுள்ள 2 முக்கிய துறைகள் எது?

அமைச்சரவைப் பட்டியலில் ஆதி திராவிடர் நலத்துறை மற்றும் சிறுபான்மையினர் நலத்துறை ஆகிய இரு துறைகள் காலியாக உள்ளன. இந்த இரு துறைகளையும் தன் சொந்தக் கட்சி எம்.எல்.ஏ-க்களுக்கு விஜய் ஒதுக்கவில்லை. இதன் பின்னணியில் விஜய்யின் மெகா கூட்டணிக்கான மாஸ்டர் பிளான் ஒளிந்திருக்கிறது என்று கோட்டை வட்டாரங்கள் கூறுகின்றன.

பட்டியலின மற்றும் சிறுபான்மையின மக்கள் தமிழகத்தின் மிகப்பெரிய வாக்கு வங்கியாக உள்ளனர். அவர்களின் மேம்பாட்டுக்கான துறைகளைத் தற்போதைக்கு விஜய் ‘ரிசர்வ்’ செய்து வைத்துள்ளார். இதன் மூலம் புதிய கூட்டணிக் கணக்குகளுக்கு அவர் அடித்தளம் அமைத்துள்ளார்.

விசிக-வுக்கு ஆதி திராவிடர் நலத்துறை?

தேர்தலுக்கு முன்னதாகவே “ஆட்சியில் பங்கு, அதிகாரத்தில் பங்கு” என்ற முழக்கத்தை விசிக மிகத் தீவிரமாக முன்வைத்தது. விசிக-வின் இந்த அதிகாரப் பகிர்வு குரலைத் தனக்குச் சாதகமாகப் பயன்படுத்த விஜய் திட்டமிடுகிறார். விசிக-வை அமைச்சரவையில் இடம்பெறச் செய்ய தவெக அழைப்பு விடுத்துள்ளது. அக்கட்சியும் இது குறித்து ஆலோசித்து வருகிறது.

விசிக விரைவில் விஜய்யின் அமைச்சரவையில் இடம்பெறும் என்று எதிர்பார்க்கப்படுகிறது. அக்கட்சியின் சார்பில் வன்னி அரசு அமைச்சராகப் பதவியேற்க வாய்ப்புள்ளதாகப் பேச்சுக்கள் அடிபடுகின்றன. அதற்காகவே ஆதி திராவிடர் நலத்துறை தற்போதைக்குக் காலியாக வைக்கப்பட்டுள்ளது. விசிக தவெக-வோடு கைகோர்த்தால் அது வட மற்றும் மத்திய தமிழகத்தில் திமுக-வின் வாக்கு வங்கியைப் பெரிய அளவில் பாதிக்கும்.

முஸ்லிம் லீக் கட்சிக்குச் சிறுபான்மையினர் நலத்துறை?

மறுபுறம், பாரம்பரியமிக்க சிறுபான்மையினக் கட்சியான இந்திய யூனியன் முஸ்லிம் லீக் (IUML) தவெக அமைச்சரவையில் பங்குபெறும் என காதர் மொய்தீன் அறிவித்துள்ளார். இந்தக் கட்சியின் சார்பாகப் பாபநாசம் எம்.எல்.ஏ ஷாஜகான் அமைச்சராகப் பதவியேற்க உள்ளார். அவருக்குச் சிறுபான்மையினர் நலத்துறை ஒதுக்கப்படும் எனத் தெரிகிறது.

தேர்தல் காலத்தில் தவெக மீது வைக்கப்பட்ட மதச்சார்பு விமர்சனங்களுக்குப் பதில் சொல்லவே இந்த நகர்வு பார்க்கப்படுகிறது. தவெக சிறுபான்மையினருக்கு எதிரான கட்சி அல்ல என்பதை நிரூபிக்க விஜய் முயல்கிறார். அவர்களுக்கு ஆட்சியில் நேரடி அதிகாரம் வழங்குவதன் மூலம் தவெக-வின் மதச்சார்பற்ற இமேஜ் பலப்படும் என விஜய் கணக்கு போடுகிறார்.

நீண்ட காலமாக திமுக-வோடு பயணித்த இக்கட்சிகள், விஜய்யின் இந்த ‘அதிகாரப் பகிர்வு’ ஆஃபரை ஏற்று தவெக-வுடன் இணையத் தயாராகி வருகின்றன.