9-வது மாடியிலிருந்து குதித்த 3 சகோதரிகள்: தற்கொலை கடிதத்தில் ‘தாய்’ பற்றி மர்ம மௌனம் ஏன்? உ.பி-யில் பயங்கரம்!

காஸியாபாத்: உத்தரப்பிரதேச மாநிலம் காஸியாபாத்தில் ஒரே குடும்பத்தைச் சேர்ந்த மூன்று சிறுமிகள் தற்கொலை செய்துகொண்ட சம்பவம், அடுத்தடுத்த போலீஸ் விசாரணையில் பெரும் திடுக்கிடும் திருப்பங்களைச் சந்தித்து வருகிறது.

திடுக்கிடும் குடும்பப் பின்னணி: போலீசார் நடத்திய முதற்கட்ட விசாரணையில், தற்கொலை செய்துகொண்ட மூன்று சிறுமிகளும் சகோதரிகள் என்பது உறுதியானது. ஆனால், அவர்கள் அனைவரும் ஒரே தந்தைக்கு, வெவ்வேறு தாய்க்குப் பிறந்தவர்கள். தந்தை சேதன் குமார், தனது மூன்று மனைவிகளுடன் (சுஜாதா, ஹீனா, டீனா) ஒரே வீட்டிலேயே வசித்து வந்துள்ளார். இதில் அதிர்ச்சியான விஷயம் என்னவென்றால், இந்த மூன்று மனைவிகளும் உடன்பிறந்த சகோதரிகள் எனக் கூறப்படுகிறது.

கடிதத்தில் இருந்த மர்மம்: சிறுமிகள் கைப்பட எழுதிய தற்கொலைக் கடிதத்தில், “அப்பா எங்களை மன்னித்துவிடுங்கள்” என்று மட்டுமே குறிப்பிட்டுள்ளனர். ஒரு இடத்தில் கூட தங்கள் தாய்களைப் பற்றி அவர்கள் மூவருமே குறிப்பிடவில்லை. 9-வது மாடியில் இருந்து குதிக்கும் முன், தங்கள் வாழ்க்கையை முடித்துக்கொள்ளும் அந்த இறுதி நிமிடங்களில் கூட தாயைப் பற்றி எழுதாதது ஏன்? என்ற கோணத்தில் போலீசார் விசாரணையைத் தீவிரப்படுத்தியுள்ளனர்.

சிக்கலான வாழ்வாதாரமும் செல்போன் அடிமையும்:

• 2015 மர்மம்: கடந்த 2015-ம் ஆண்டு சேதனுடன் வசித்த ஒரு பெண் மாடியிலிருந்து விழுந்து பலியானதும், அது தற்கொலை என முடித்து வைக்கப்பட்டதும் இப்போது மீண்டும் சர்ச்சையாகியுள்ளது.
• பொருளாதார நெருக்கடி: சேதன் குமார் கடும் நிதி நெருக்கடியில் இருந்ததும், சிறுமிகள் பள்ளிக்குச் செல்லாமல் வீட்டிலேயே முடங்கியிருந்ததும் தெரியவந்துள்ளது.
• கொரியன் கேம் (Korean Games): பள்ளிக்குச் செல்லாத நிலையில், கையில் இருந்த செல்போனில் கொரியன் ஆன்லைன் விளையாட்டுகளுக்கு சிறுமிகள் அடிமையாகியிருந்தது அவர்கள் தற்கொலைக்கு ஒரு முக்கிய தூண்டுதலாக இருந்திருக்கலாம் என அஞ்சப்படுகிறது.