தமிழ்நாடு முழுவதும் மத்திய அரசுக்கு எதிராக பரபரப்பு சுவரொட்டி!
சென்னை: தமிழகத்தில் மத்திய அரசுக்கு எதிராக கடும் எதிர்ப்பை வெளிப்படுத்தும் விதமாக, பல்வேறு இடங்களில் புதிய சுவரொட்டிகள் ஒட்டப்பட்டுள்ளன. “மோடி அரசு தமிழ்நாட்டை வஞ்சிப்பது ஏன்?” எனக் கேள்வி எழுப்பும் இந்த சுவரொட்டிகள், தமிழ்நாடு முழுவதும் பரவியுள்ளன.
திமுக மற்றும் அதன் கூட்டணி கட்சி தலைவர்களின் படங்களுடன், “தமிழன்னையை அவமதித்து இழிவுபடுத்துகிறது மத்திய அரசு” என்ற வரிகள் இடம்பெற்றுள்ளன. மேலும், பாஜக அமைச்சர்கள் கூறும் ஆணவமுள்ள பேச்சுகளும், தமிழர்களின் உரிமைகள் மீதான அநியாயமான செயல்களும் தமிழக மக்களின் ஆவேசத்தை தூண்டியுள்ளதாகக் கூறப்படுகிறது.
இந்த சுவரொட்டிகள் தமிழகத்தின் பல இடங்களில், குறிப்பாக அரசியல் பிரசாரப் பதாகைகள் அருகில் ஒட்டப்பட்டுள்ளன. இதில் பிரதமர் மோடியின் படம், தமிழக பாஜக தலைவர் அண்ணாமலை போன்றவர்களின் பிரசாரப் படங்கள் மேல் ஒட்டப்பட்டிருப்பது குறிப்பிடத்தக்கது. இது, மாநில அரசியலில் “தமிழ் மொழி – இந்தி விரோதம்” என்ற விவாதத்தை மீண்டும் தூண்டியுள்ளது.இது தமிழகத்தில் நீண்டகாலமாக நடைபெற்று வரும் மொழிப் போராட்டத்திற்கான சமீபத்திய ஒரு வெளிப்பாடாக பார்க்கப்படுகிறது.
“தமிழ்நாடே கிளர்ந்தெழு, ஓரணியில் கொட்டிடு போர் முரசு!” என்ற முழக்கத்துடன் பதாகைகள் ஒட்டப்பட்டுள்ளன. இதனால், மாநில அரசியல் மேலும் பரபரப்பாகியுள்ளது.
மத்திய அரசின் கொள்கைகள் மற்றும் பாஜகவின் நடவடிக்கைகள் குறித்து எழுப்பப்படும் இந்த எதிர்ப்புகள், தமிழக மக்களிடம் எவ்வளவு ஆதரவை பெறும்? அரசியல் கட்சிகள் இதற்கு என்ன பதிலளிக்கப் போகின்றன? என்பதற்கான பதில் விரைவில் வெளிப்படும் என்று எதிர்பார்க்கப்படுகிறது
