- அமெரிக்காவில் தெலங்கானாவைச் சேர்ந்த 30 வயது இளைஞர் போலீசாரால் சுட்டுக்கொல்லப்பட்டார்.
- ஏ.சி. தொடர்பாக ஏற்பட்ட தகராறில் அவர் தனது சக ஊழியரை கத்தியால் குத்தியதாகக் கூறப்படுகிறது.
- சுடப்படுவதற்கு சில வாரங்களுக்கு முன்பு, அவர் அமெரிக்காவில் இனவெறி மற்றும் துன்புறுத்தலை எதிர்கொண்டதாக LinkedIn பக்கத்தில் பதிவிட்டிருந்தார்.
அமெரிக்காவின் கலிபோர்னியா மாகாணத்தில் உள்ள சாண்டா கிளாரா நகரில், தெலங்கானாவைச் சேர்ந்த 30 வயது தொழில்நுட்ப நிபுணரான முகமது நிஜாமுதீன் என்பவரை, அமெரிக்க போலீசார் சுட்டுக் கொன்ற சம்பவம் அதிர்ச்சியை ஏற்படுத்தியுள்ளது.
செப்டம்பர் 3ஆம் தேதி, நிஜாமுதீன் தனது சக ஊழியருடன் ஏ.சி. தொடர்பாக ஏற்பட்ட வாக்குவாதத்தில், அவரை கத்தியால் குத்தியதாகக் கூறப்படுகிறது. இதையடுத்து, 911 அவசர எண்ணுக்கு அழைப்பு வந்ததையடுத்து, சாண்டா கிளாரா போலீஸ் துறை (SCPD) சம்பவ இடத்திற்கு விரைந்து சென்றது.
போலீசார் சம்பவ இடத்திற்கு வந்தபோது, நிஜாமுதீன் கத்தியுடன் தனது சக ஊழியரைத் தாக்கியதாகக் கூறப்படுகிறது. போலீசார் இருவரையும் கைகளைக் காட்டும்படி அறிவுறுத்தினர். ஆனால், நிஜாமுதீன் மட்டும் அதற்கு இணங்காததால் போலீசார் அவரை சுட்டுக் கொன்றனர்.
இது குறித்து இறந்த நிஜாமுதீனின் உறவினர் ஒருவர் கூறுகையில், “போலீசார் அறைக்குள் நுழைந்தபோது, அவர்கள் கைகளை உயர்த்துமாறு கேட்டனர். ஒரு நபர் ஒப்புக்கொண்டார், மற்றவர் (நிஜாமுதீன்) இணங்கவில்லை. இதையடுத்து போலீசார் நான்கு ரவுண்டுகள் சுட்டனர். எந்தவிதமான முறையான விசாரணையும் இல்லாமல் துப்பாக்கிச் சூடு நடந்தது மிகவும் வருந்தத்தக்கது,” என்று தெரிவித்துள்ளார்.
சடலத்தை சொந்த ஊருக்குக் கொண்டுவர கோரிக்கை
இந்தச் சம்பவத்தைத் தொடர்ந்து, நிஜாமுதீனின் தந்தை முகமது ஹஸ்னுதீன், இந்திய வெளியுறவுத் துறை அமைச்சர் எஸ்.ஜெய்சங்கருக்கு கடிதம் எழுதியுள்ளார். தனது மகனின் உடலைத் தெலங்கானாவில் உள்ள மஹபூப்நகருக்குக் கொண்டுவர இந்திய தூதரகத்தின் உதவியை அவர் கோரியுள்ளார். செப்டம்பர் 18 அன்றுதான் தனது மகனின் இறப்பு குறித்த தகவல் தங்களுக்குத் தெரிவிக்கப்பட்டது என்றும் அவர் குறிப்பிட்டுள்ளார்.
இனவெறி புகார் மற்றும் குடும்பத்தினரின் குற்றச்சாட்டு
இந்தச் சம்பவம் குறித்து சாண்டா கிளாரா போலீசார் விசாரணை நடத்தி வரும் நிலையில், நிஜாமுதீனின் குடும்பத்தினர், இது இனவெறி தாக்குதல் என்றும், முழுமையான விசாரணை நடத்தப்பட வேண்டும் என்றும் கோரிக்கை விடுத்துள்ளனர்.
இந்தச் சம்பவம் நடப்பதற்குச் சில வாரங்களுக்கு முன்பு, நிஜாமுதீன் தனது LinkedIn பக்கத்தில் ஒரு பதிவை வெளியிட்டிருந்தார். அதில், அமெரிக்காவில் தான் இனவெறி வெறுப்பு, இனவெறி பாகுபாடு, துன்புறுத்தல், ஊதிய மோசடி மற்றும் தவறான பணிநீக்கம் போன்றவற்றை எதிர்கொண்டதாகக் குறிப்பிட்டிருந்தார். மேலும், “இனவெறி வெள்ளை அமெரிக்க மனநிலை முடிவுக்கு வர வேண்டும். நிறுவனங்களின் கொடுங்கோன்மை முடிவுக்கு வர வேண்டும், இதில் சம்பந்தப்பட்ட அனைவரும் கடுமையாக தண்டிக்கப்பட வேண்டும்,” என்றும் அவர் குறிப்பிட்டிருந்தார். இந்தப் பதிவு குடும்பத்தினரின் சந்தேகத்தை மேலும் வலுப்படுத்தியுள்ளது.
